KUCHING, 31 Julai: Mensia mayuh udah berengkah meri perati sereta majak rindu ngelawa muzium.
Menteri Dagang Temuai, Industri Kreatif Enggau Seni Pemerindang Sarawak, Dato Sri Abdul Karim Rahman Hamzah madah, iya ngasaika nya siti pekara ke chukup manah sereta ngemegah ati.
Tandu Abdul Karim, muzium diatu ukai semina dipeda nyadi galeri nyimpan keresa lama aja, tang mega nyadi palan sejarah ke patut dipelajar lebih agi raban rebak baru.
Seraya meri chunto ngagai Muzium Budaya Borneo, Abdul Karim madah, kenyau dibuka kena bulan March tu tadi, Muzium Budaya Borneo udah mujur matak lebih 700,000 iku temuai datai.
“Enda kala kitai meda penatai temuai ngagai Muzium di Sarawak ngemayuh tu.
“Nyadi ari nya kitai meda minat (mensia mayuh) ngelawa muzium chukup tinggi.
“Nya alai aku ke nyadi Menteri Dagang Temuai berasai chukup gaga meda bisi siti taba tauka endur dikerindu bala temuai sekalika nya temuai luar tauka dalam dalam negeri.
“Nyadi nya diperati udah meri pangka ke besai ngagai temuai,” ku iya.
Abdul Karim mansutka jaku nya maya pengawa bejadika Hari Muzium Antarabansa Renggat Nasional 2023 ditu pagi tadi.
Ngelansa pasal pengerami Hari Muzium Entarabansa (HMA) 2023, iya melabaka urung 50,000 temuai deka datai ngulu pengerami renggat ke-27 nya.
HMA 2023 diatur berengkah 31 Julai nyentuk 5 Ogos 2023 ba Muzium Budaya Borneo ti nungkatka pejuluk ‘Muzium, Kemampanan Dan Kesejahteraan”.-TVS
