GEDONG, 23 Julai: Anak Sarawak lebih agi nembiak rebak baru mesti nyikap pemansang bakat ke dikembuan diri empu laban pekara nya diperati ulih mantu ngemansangka nengeri tu dudi hari.
Premier Sarawak Datuk Patinggi Tan Sri Abang Johari Tun Openg madah pemansang bakat entara pekara ke diberi perati perintah lebih agi dikena nyungkak pemansang nengeri.
“Tu mih chara dikena kitai nyungkak ekonomi.
“Nya alai, bala anak semua mesti belajar tiga pugu ti udah disebut aku tadi.
“Semua nya deka dipejalaika. Tu mega deka mekuhka pemansang bakat. Kita nembiak mih ti nentuka pemansang bakat ulih dikemujurka,”ku iya.
Abang Johari ke mega Kaban Kunsil Nengeri (ADUN) Gedong madah munyi nya maya bejaku ba Program Nutup Kem Ketuai Nembiak Emart ba Sekula Sekondari (SMK) Gedong, sehari tu tadi.
Nangkan ke nya, Abang Johari mega meransang raban nembiak mesti nemu senentang polisi enggau program pemansang ti dalam perambu enggau benung dipejalaika perintah Sarawak lebih agi bekaul enggau teknologi baru, ekonomi gadung, kuasa ulih dikemaru sereta ke bukai.
Ku iya, Sarawak chukup begunaka raban tebangkar ti bisi pengelandik dalam bidang sains ti nyerangkung kimia, fizik, biologi, matematik enggau ke bukai dikena mantu ngemujurka juluk nyadi nengeri pemadu maju 2030 ba sukut penemu.
Pia mega ku raban nembiak sekula mesti nguasa sereta pintar ba semua subjek nya laban sida mih ti dikeandal nampung pengawa ngemansangka Sarawak dudi hari.
Ku iya, bisi tiga pugu ti dikemeratka perintah Sarawak ba baruh Strategi Pemansang Pasca Covid-19 (PCDS) 2030 iya nya pengelantang ekonomi, pengelantang rama sereta pemeruan rampa menua.
“Nembiak sekula mesti pandai matematik, fizik enggau kimia laban enti kitai deka ngeluarka hidrogen mesti bisi penemu pasal kimia.
“Ambika banding nemu pasal molekul ti tusah deka dipechah.
“Nya alai, kitai beguna nembiak ti ulih nyadi tebangkar dalam semua subjek tu ngambika manggai taun 2030 ila Sarawak tau nyadi nengeri pemadu maju ari sukut penemu,”ku iya. -TVS
