KUCHING, 22 Julai: Buah merdeka ke diasai kenyau 60 taun ke udah mandangka kuasa merintah nengeri enggau nentuka kuing tuju pemansang Sarawak bepanggai ba bahu anak Sarawak empu.
Premier Sarawak, Datuk Patinggi Tan Sri Abang Johari Tun Openg madah, nya endang sebengkah ari buah merdeka ke patut ditegap enggau dijaga manah ba nengeri tu ngambika Sarawak terus maju, lantang senang sereta dikelala komuniti serantau enggau dunya luar.
“Kenyau 2017, pengudah aku nampung pangku pengawa ngiring Sarawak ari niang Pehin Sri Adenan, begulai enggau bala bakih kabinet dalam Perintah GPS, kami udah naka ulih nyungkak status ekonomi Sarawak nyadi ekonomi maju bepenatai pemisi tinggi manggai taun 2030,” ku iya.
Iya madah munyi nya rambau Gempuru enggau Pengawa Bejalai Beraban Nyerumba Pengerami Ngintu 60 Taun Sarawak Merdeka di Padang Merdeka Kuching, pagi tadi.
Nangkan ke nya, ku Abang Johari ari sebuah ekonomi kovensional, Sarawak diatu ba pelasar ke tegap nyadi sebuah ekonomi ke dirandang teknologi digital, data enggau inovasyen.
“Nengah sekeda inisiatif digital, Sarawak diatu nyadi nengeri ti jauh nyingkang ke mua dalam proses enggau nuju digitalisasyen ekonomi enggau adminstrasyen penuh.
“Nengah inisiatif, injiniring dikemaru Sarawak mujur nambahka asil penatai pemisi nengeri manggai RM11.9 bilion ba taun 2022 mega nyadi rikod laban selalu iya asil nengeri tu datai ba tikas RM4 ke RM5 bilion aja.
“Tu endang penambah sekali lipat dalam timpuh empat taun,” ku terang iya.
Berebak enggau nya, Abang Johari madah diri andal dalam timpuh tujuh taun enggau ke deka datai nyentuk 2030 penatai pemisi nengeri Sarawak deka terus nambah nengah pengerembai pengawa ngumpul asil nengah inisiatif-inisiatif dibaruh ekonomi gadung.-TVS
