SIBU, 22 Julai: Penanggul payung enggai ngerembai lebuh nyereta sebengkah Demonstrasyen Payung Terejun nyadi pengingat pemadu enda ulih buai Koperal (B) Jimbau Galau, 63 taun.
Peranak asal ari Rumah Ingkok Mungu, Durin Kanan di Sibu ke mega YDP Gerempung Veteran Soldadu Darat Malaysia (PVATM) Sarawak madah, insiden nya nyadi kena 6 September 1991.
“Utai ke sigi dikeingat aku sampai mati iya nya insiden ke nyadi kena 6 September 1991.
“Nyadi kami ba unit payung terejun maya nya bisi ngaga demonstrasyen terejun bibas. Nyadi aku tu nyadi penerejun lumur tiga, maya ke udah terejun enda memukai payung terejun aku tu tadi enda befungsyen reti iya tadi iya ngerembai tang iya empu ‘brek’ nya besimpul.
“Mina aku ulih ngatur maya payung terejun aku nya udah datai ba tikas 2800 (kaki peninggi) baka nya,” ku iya maya nusuika siti ari cherita pengingat maya iya agi gawa nyadi soldadu kelia ngagai TVS apin lama ke udah.
Ku Jimbau mega apai ngagai empat iku anak madah ke maya nya orang ke meda iya labuh ari baruh sigi nyangka iya nadai jalai idup.
“Nyadi bala sida ke meda ari baruh sigi ngumbai aku tu tadi sigi nadai jalai idup tang nasit manah ga maya nya Tuhan agi nyangkung iya terubah maya aku angkat kaki dulu diasur-asur aku nadai ga patah,” ku tandu iya.
Nitihka rikod, Koperal (B) Jimbau Galau berengkah dipilih nyadi soldadu darat kenaka 10 April 1981 sereta masuk Unit 8 Renjer ba Kem Oya di Sibu sepengelama tiga taun sebedau pindah ngagai Kem Terendak di Melaka ba taun 1984.
Sekumbang nyadi soldadu darat sepengelama 22 taun, Jimbau mega kala nyereta mayuh macham operasyen baka Operasyen Kejaman enggau ke bukai.
Iya pinchin kena 10 April 2003 ba Semilan Briged Kem RASCOM di Sibu.-TVS
