BETONG, 10 Julai: Raban orang indu ke diau ba menua pesisir lebih agi di pelilih Betong diperansang patut nemu ngerebut peluang ari aktiviti ekonomi ke bisi disediaka perintah.
Sapit Premier Sarawak, Datuk Amar Douglas Uggah Embas madah, sida mega patut nemu nguna peluang nya dikena nyungkak penatai pemisi ruang bilik laban tu chukup seriris enggau penerang ari bank dunya ti madahka Sarawak udah nyapai status nengeri ke bepenatai pemisi tinggi.
“Nya alai rayat enda tau enda ngambi peluang ngambi awak ari tulung tu tadi.
“Aku arapka kitai sama-sama bekerejasama betulung besukung laban juluk kita deka semua rayat mansang,” ku iya.
Uggah ke mega Kaban Kunsil Nengeri (ADUN) Bukit Saban bejaku munyi nya maya bejadika Program Wanita Bangkit diatur ba Balai Raya Mensia Mayuh Spaoh, kemari.
Nangkan ke nya, Uggah ngarapka ‘Program Wanita Bangkit’ baka ke diatur di Spaoh nya patut suah agi diatur ba rumah-rumah panjai dudi hari.
“Aku arapka program tu ukai semina abis ditu (Spaoh) lalu ditampung lalu disukung kitai mayuh.
“Tu ngambika YB Dato Sri Nancy ke mega orang Sarawak ulih nemu penanggul ditapi kitai di Sarawak.
“Kitai agi bisi seranta sereta agi bisi penanggul ba pelajar.
“Nya alai, aku ngarapka atur sekali agi program ke sama ba rumah panjai bukai awakka program tu terus ngerembai,” ku iya.
Ungkup penerang, Program Wanita Bangkit sebedau tu dikumbai Program Mykasih Capital diatur Opis Menteri Pemansang Indu, Ruang Bilik enggau Komuniti (KPWKM) begulai enggau Opis Pengelikun Rama (PERKESO) sereta betuju meri bantu ngagai raban orang indu ti tebunsa penatai pemisi ketegal pandemik Covid – 19 baka indai tungal enggau ke bukai.-TVS
