BETONG, 10 Julai: Bisi 5830 iku penyereta Program Bangkit @ Opis Menteri Pemansang Indu, Ruang Bilik enggau Komuniti (KPWKM) ba selampur malaysia.
Menteri Pemansang Indu, Ruang Bilik enggau Komuniti Dato’ Sri Nancy Shukri madah ari semua penyampau nya bisi 3181 iku penyereta ari Sarawak.
“Enti ba Sarawak ditu KPWKM udah nulung ba selampur Sarawak sepenyampau 3181 iku sida ke nyereta Program Wanita Bangkit kenyau ari aku nyadi Menteri Pemansang Orang Indu.
“Nya alai, lebuh kitai udah diberi tanggungpengawa kitai mesti nulung bala kitai di Sarawak, kitai enda tau enda bekerejasama,” ku iya.
Nancy madah munyi nya maya Program Wanita Bangkit dipenyadi Sapit Premier Sarawak Datuk Amar Douglas Uggah Embas, diatur ba Balai Raya Mensia Mayuh Spaoh, kemari.
Sama bisi datai ngulu program nya Kaban Parlimen Betong, Dr Richard Rapu, Tuai Pegawai Eksekutif Yayasan Kebajikan Negara (YKN) Nordina Haron, Residen Bagi Betong, Richard Michael Abunawas, Pegawai Penguasa Pelilih Mit Spaoh Lester Clement Guwie enggau ke bukai.
Berebak enggau nya, Nancy madah Program Wanita Bangkit @ KPWKM udah tu deka dikerembai tauka dipejalaika ba menua bukai baka Bintulu.
“Kitai udah ke Sibu ke Miri, Kuching, Lundu, Simunjan, Samarahan, Bau enggau lalu sehari tu di Betong.
“Udah tu, kitai deka ngagai endur bukai baka Bintulu enggau ke bukai,” ku iya.
Rambau program nya mega bisi 587 iku orang indu ari pelilih Betong bisi nerima bantu mata duit sepenyampau RM500 siku ari KPWKM.-TVS
