BINTULU, 8 Julai: Opis Menteri Kereja Raya (KKR) benung nganti agih belanja dikemendar ungkup projek neriki enggau ngaduka Jalai Bakun ke dipinta nengah Rolling Plan 4 Langgur Pemansang Malaysia Lumpar Ke-12 (2024).
Menteri iya, Datuk Seri Alexander Nanta Linggi madah, batang pengawa projek nya neriki jalai tunggal arung dua begembar sepanjai 128.46 kilometer nya deka nitihka standard R3 Opis Kereja Raya (JKR).
Taja pia, beduduk ari penyampau belanja perintah ke enda mayuh dikena neriki semua jalai nya ngujungka jalai nya lama diteju iya nya lebih 20 taun, ngelui ari timpuh tujuh taun ungkup dedini jalai ke bisi ba menua tu.
“Tang kitai ulih mega meri bajet ungkup taun tu dikena neriki sepanjai jalai tu ukai ungkup neriki sekeda endur ke balat rusak laban kitai udah ngelala dini endur ke balat rusak nya.
“Kitai bisi dipadahka urung RM15 juta agih belanja,”ku iya.
Iya mansutka pekara nya pengudah ngabas taba projek nya ngerimbai Simpang Jalai Bakun ditu, kemari.
Ku terang Nanta, opis menteri iya mega udah bejalaika pengawa baka selama ungkup jalai perintah besai nya ke dipelaba beungkus RM4 juta setaun enggau urung RM17.8 juta mega diagih dikena ngetar jalai belanggang lalu ukai ungkup ngetar jalai belanggang ari 2018 nyentuk 2023.
Sekeda atur lengkas mega udah digaga nengah konsesi nya dikena mutarka penanggul timpuh pandak baka ngaduka jalai belubang.
Ungkup timpuh bulan Januari nyentuk Mei taun tu tadi, bisi 762 pengawa ngalitka jalai belubang dikereja lalu tiga bengkah pengawa manggai RM6 juta bajet udah diguna ungkup ngetar baru jalai ke rusak.
Entara kebuah jalai nya rusak ketegal kena tepan kereban pengangkut kelalu berat.
Ungkup atur bekaul udah tu, raban sida deka bejalaika mayuh agi pengawa penerit adat baka masang papan tanda awakka penguna jalai nadai agi penguna jalai mantaika dalih enda nemu tikas pemerat tauka tatak pengelaju ba jalai nya.
Berebak enggau nya, Nanta minta orang ke ngempu kereban pengangkut berat patut nitihka atur tatak pemerat awakka jalai nya lebih tan lama enggau meri pengelantang ngagai mensia mayuh ke suah betengahka jalai nya.-TVS
