LIMBANG, 8 Julai: Sapit Premier Sarawak, Datuk Amar Awang Tengah Ali Hasan madah sektor eko dagang temuai deka terus diberi perati dikena ngerembaika ekonomi Sarawak.
“Budaya ke bisi dikembuan kitai, iya nya kitai tu datai ari pupu bansa, nya endang siti ari pematak ekodagang temuai.
“Nyadi kitai deka nyaran kia ngambika diangkat agi.
“Kitai udah ba menasan (engkeman), nama pekara ke beguna diatu iya nya kitai deka nambahka agi sukung ari raban peribit enggau komuniti nya empu,” ku iya.
Awang Tengah ke mega Kaban Kunsil Nengeri (ADUN) Bukit Sari madah munyi nya maya Pengawa Nyuaka Bantu Geran Tambah, Projek Mit Menua Pesisir (MRP) 2022 Pelilih Limbang ba Opis Residen Limbang ditu, kemari.
Nangkan ke nya, Awang Tengah madah nya endang sebagi ari chara dikena perintah nengeri terus ngemansangka Sarawak awak ke ulih nyapai status menua maju lalu ngembuan komuniti ti bepenatai pemisi tinggi.
Tandu iya, Sarawak mega deka nyemelaka pemansang enggau pemeruan rampa menua, nentuka pemanah kampung Sarawak sereta bejalaika pengawa nanam baru kampung.-TVS
