BETONG, 6 Julai: Semua gerempung ukai perintah (NGO) Dayak ti bisi ngibun keresa ngepan ari kereban tubuh jelu diperansang minta lisin ari ejensi perintah ke bekaul baka Sarawak Forestry Corporation (SFC).
Chairman Kelab Ngepan Betong (KNB), Sigat Anak Sang madah, lisin nya chukup beguna ngambika sida enda kena tinggang atur undang-undang ke bekaul ketegal ti ngibun kereban jelu nyadika pengias ba ngepan.
“Nyadi aku meransang bala NGO kitai Iban ke bisi ngibun kereban ari tubuh jelu tauka burung anang enda ngambi lisin.
“Ukai reti (lisin) nya dikena kitai meransang sida ngiga jelu, tang beduduk ari atur perintah ke majak terit bekaul enggau tagang ngiga jelu ke dilindung.
“Aku nemu mayuh NGO kitai (Dayak) di Sarawak bisi ngibun keresa lama ke jarang dibantai sereta nadai kala digagaka lisin,” ku iya.
Sigat madah munyi nya ngagai TVS bekau pemujur Kelab Ngepan Betong (KNB) udah bulih lisin ari SFC kena 13 June tu tadi ungkup nyimpan kereban jelu dikena ngias ngepan ditu, ensana.
Ku tandu iya, nengah pemisi lisin nya sida nadai agi nangi lebuh bekenaka ngepan tauka ngembuan rengka jelu enggau burung ba dini-dini alai bisi rami.
“Nya alai, awakka nadai penangi ba ati kitai ke ngibun keresa pesaka nyadi endang patut kereban nya dipintaka lisin.
“Enti udah bisi lisin, kitai bela ulih ngerembai enggau ngelakuka pemanah ngepan kitai Iban nya nengah kelab tauka gerempung.
“Ambika banding, sida Kelab Gagung Miri udah bisi lisin tu.
“Nyadi, aku meransang semua kita ke angkun ngibun keresa lama tu anang enda ngambi lisin awakka nadai penanggul lebuh dek mindah kini-kini penungga,” ku iya.
Ungkup penemu entara keresa ari tubuh jelu ti suah dipeda nyadi kereban pengias ngepan Iban iya nya kulit jugam, kulit engkuli, tangkung kenyalang enggau tajai, bulu burung ruai tauka bulu burung kenyalang enggau ke bukai.-TVS
