KUALA LUMPUR, 30 Jun: Pengawa milih Raban Soldadu Darat (ATD) seruran tebuka ngagai semua rayat menua Malaysia ti deka masuk nyadi kaban unit beuniform nya.
Nadai ulah bechiping bansa dalam milih raban ATD, ku Panglima Soldadu Darat (PTD), Jeneral Tan Sri Mohammad Ab Rahman.
Ku iya, pengawa masuk ATD nya semampai tebuka ngagai barang sapa peranak menua Malaysia ti deka minta masuk nyadi kaban beuniform nya.
Udah nya ku terang iya, asil ari pansik, bisi sekeda kebuah ngujungka profesion nyadi soldadu kurang dikerindu.
“Pengawa nyadi soldadu tu chukup mudah dituntung penusah lalu sida ngasai ari penyadi nya.
“Udah nya, gaji ke diberi baka enda setipak enggau penusah ke nyangka ditapi sida.
“Nangkan ke nya, kedua laban sida mesti nitihka atur disiplin ke terit nyadi sida ngasai diri ‘ditanchang kaki’ lebuh udah masuk nyadi soldadu ketegal atur nya,” ku iya.
Iya madah munyi nya maya Pengawa Nyayat Genselan Soldadu Darat 2023 ba Kem Perdana Sungai Besi, ditu kemari.
Berebak enggau nya, ku Mohammad nadai kuota diagih ngagai sebarang orang lalu iya meransang rayat Malaysia ke endang ngasai diri regas tau minta masuk nyadi ATD.
Tandu iya, soldadu darat mega udah ngatur kimpin penerang ba mayuh sekula dikena nerenak minat bansa ukai Bumiputera masuk raban unit beuniform nya. -TVS
