KAPIT, 30 Jun: Dua iku baya ke suah ayan ba Sungai Oyan benung digiga laban diperati ngeruga pengelikun mensia mayuh nyengkaum bala nembiak ba Sekula Primari (SK) Nanga Oyan.
Beduduk ari nya, operasyen khas nangkap baya nya udah dipejalaika bekau ari ripot ke diterima ari mensia mayuh bekaul enggau keruga baya nya.
Tuai Balai Bomba Enggau Penyah Penusah Kapit, Penulung Penguasa Bomba (PPgb) Timoty Barat madah, operasyen nya berengkah kenyau 26 June tu tadi.
“Operasyen nangkap baya nya ngaul raban Sarawak Forestry Corporation udah berengkah kenyau 26 June tu tadi sereta disaup raban polis, raban bomba enggau raban staf sekula enggau peranak rumah panjai.
“Jelu nya dipeda (kala) ayan ba tebing Sungai Oyan udah ngirauka ati enggau ngeruga pengelikun mensia mayuh nyengkaum nembiak sekula ba SK Nanga Oyan,” ku iya madah nengah sebengkah penerang kemari.
Ku tandu penerang nya, taja agi nadai sebarang kes kena tagup baya diriipot ba sitak nya tang mensia mayuh lebih agi raban sekula ba SK Nanga Oyan madah penatai baya nya ngeruga aktiviti ke dikereja sida ninting hari.
“Kala nyadi sebedau tu, baya nya dipeda nguji nerekam jelu tupi peranak ba Nanga Oyan.
“Kenyau ari nya, mensia mayuh ke diau besemak nadai berani nurun ke sungai laban nangi kena serang baya nya,” ku iya.
Nya alai, dIkena bejejaga, SFC nagang mensia mayuh bejalaika sebarang pengawa ba sungai sekumbang operasyen dipejalaika.
Operasyen nya deka diketu dulu naka pukul 12.00 tengahari (kemari) seraya nganti baya nya bisi dipeda baru operasyen nangkap baya disambung. -TVS
