SARATOK, 30 Jun: Kaban Kunsil Nengeri (ADUN) Krian Friday Belik ngarapka semua 10 buah projek ke udah dianjung nengah Ejensi Pemansang Bagi Menua Betong (BDDA) renggat 1 ungkup sitak krian ulih dikemendarka perintah nengeri.
Ku iya, tu chukup beguna laban semua projek pemansang ke udah dipilih nya dikeandal ulih nyungkak penatai pemisi rayat di Krian dudi hari.
“Ungkup renggat keterubah tu bisi bisi 10 buah projek deka digaga belabuh ari taun tu.
“Nya alai, ari 10 projek nya ketebal agi iya nya projek ngaga jalai, ngaga jalai baru lalu pia mega deka ngemanah ke agi jalai ke udah bisi diatu.
“Diatu projek nya benung nerima perati Opis Sekretari Pekara Wang Nengeri ungkup dikemendar.
“Nya alai, arapka semua nya dikemendar…projek ba renggat keterubah tu semina beungkus RM100 juta,” ku iya.
Friday madah munyi nya pengudah Pengawa Sembiang Mass sereta Pengerami Ngiling Tikai ba Rumah Insol Malong Atas Awik ditu, kemari.
Udah nya ku Friday, ba Aum Renggat Kedua BDDA udah tu deka mantai ke projek bekaul enggau pekara infrastruktur kelimpah ari projek pemansang ekonomi ungkup rayat di Krian.
“Ba aum kedua ila, aku deka mantaika langgur projek infrastruktur baka projek ngemanah tauka ngaga jalai.
“Udah nya, kitai deka fokus ngagai program ngemansang ekonomi rayat baka program betanam betupi dikena nyungkak penatai pemisi rayat ditu,” ku terang iya.
Ngelansa pekara bukai, Friday bisi meransang mensia mayuh bela sampal datai ngerichahka Pesta Saratok 2023 ti deka berengkah pagila.
Kebuah pia ku iya chukup mayuh aktiviti udah ditusun lalu arapka program nya ulih nyungkak penatai pemisi raban ke bisi ngambi bagi ba pengawa dagang.
Entara aktviti disadang dianti-anti mensia mayuh maya pengerami tu ila iya nya Pekit Lumba Perau tauka ngerebut gelar Raja Sungai ti nyendiaka perais mata duit sepenyampau RM15,000.-TVS
