KAPIT, 24 Jun: Ngelala reti merdeka enda ulih ngetu naka lepas ari pegai koloni laban reti ke amat iya nya jauh lebih besai nyengkaum ari sukut pemansang enggau ekonomi.
Kaban Parlimen Kapit, Dato Seri Alexander Nanta Linggi madah, laban ke nyadi rayat di bumi merdeka, rayat mayuh patut pansut ari pekuh runding ke lama lalu berengkah berunding nyadi rayat menua mansang.
“Reti ke amat merdeka tu ukai semina ditatak naka lepas ari pegai koloni, tang lebih ari nya.
“Iya mega mungkur pengawa genap iku kitai merdeka ke diri empu.
“Rayat enggau menua ari isu ke mar baka pekuh penyeranta, pelajar, ekonomi, rama, pemansang enggau mayuh agi ke bukai.
“Pengawa tu enda ulih dijapai nyema kitai agi tepekul dalam penemu ke lama,” ku iya.
Nanta ke mega Menteri Kereja Raya madah munyi nya maya Pengerami Makai Lemai Ngintu Pengerami 60 Taun Sarawak Merdeka di Dewan Suarah Kapit, malam tadi.
Tandu Nanta empas merdeka sereta pengelantang diatu bepanggai ngagai rebak baru dalam nentuka Sarawak terus mansang ke mua dalam mayuh sektor.
“Kelimpah jalai raya, mayuh agi pengawa ngaga infrastruktur enggau perengkaguna bukai udah enggau benung digaga ditu.
“Aku andal Kapit ulih mansang sebaka enggau mengeri besai ba Sarawak baka Kuching, Miri, Sibu enggau Bintulu,” ku iya.-TVS
