SARATOK, 18 Jun: Pemutus Perintah Sarawak ti sedia ngambi atur bejalaika operasyen Serikat MASwings baka ke udah dipansutka Premier Sarawak Datuk Patinggi Abang Johari Tun Openg dikearap meri pemaik ngagai rayat enggau menua tu.
Maya dirandau TVS, siku orang gawa perintah Mandie Garan madah enti mujur pekara nya ulih meri penyenang enggau pengelantang ngagai rayat Sarawak empu.
“Beduduk ari pekara tu udah disetuju sechara prinsip nyadi arapka iya ulih meri empas ari sukut rega tikit bilun ke lebih murah ngagai rayat nengeri tu,”ku iya.
Udah nya, ba penemu siku pengajar Louis Victor Ringgi madah ke enti perambu nya mujur dia rayat nengeri tu disadang deka ngasaika mayuh pemaik.
“Enti perintah Sarawak udah mujur ngempu serikat nya nyadi kitai Sarawak bisi pengelebih, nyamai nemuai ke Semenanjung tauka ke Sabah.
“Pia mega temuai ari Semenanjung datai ke Sarawak tentu lebih mudah,”ku iya.
Siku agi pengajar Elvynie Thilda Sangan Louis Victor madah arapka pemujur ngempu serikat MASwings nya meri pemaik ngagai bala nembiak tu benung nampung pelajar ba luar Sarawak.
“Ba penemu aku nya manah ngagai kitai di Sarawak ditu laban nya ulih mantu bala nembiak lebih agi sida ke benung belajar ba Semenanjung.
“Ari sukut rega tikit ari Semenanjung, sida din ulih ngagai Sarawak lalu pia mega kitai ditu lebih agi raban nembiak ke benung belajar.
“Nyadi kitai ngarapka rega tikit udah tu ila enda bangat kelalau mar awakka kitai nyamai agi mindah empas ari atur bejalaika operasyen MASwings,” ku iya.
Udah nya, Rostina Wong madah atur ngempu Serikat MASwings nya chukup ngemegah lalu nya siti agi kelai pemujur Perintah Sarawak dalam ngemansangka menua enggau ngintu pengelantang rayat di nengeri tu.
“MASwings nya beguna amat enti kitai ari Sarawak tu diberi orang peluang nya amat gaga amat ati kitai iyaka ba Sarawak ditu awak ke kitai majak maju majak dipeda orang mih kitai ulih ngadu ke utai ke besai ulih dipegai kitai menua tu,” ku iya.
Semua sida mansutka timbal nya maya dirandau TVS nyerumba Pengerami Bejadika Biro Indu enggau Pengerami Ngiling Bidai ba Rumah Jenalius Unchie Sungai Brangan Panjai, apin lama ke udah.
Pengerami nya bisi digulu Kaban Kunsil Nengeri (ADUN) Krian Friday Belik sereta bala tuai raban bansa.-TVS
