KUCHING, 16 Jun: Siti agi adat asal bansa Iban ti deka dibantaika maya program Niti Daun 2023 ke diatur lemai Hari Enam tu iya nya Adat Muka Kujuk.
Menteri ba Opis Premier Sarawak, Datuk John Sikie Tayai madahka Premier Sarawak Datuk Patinggi Tan Sri Abang Johari Tun Openg deka diberi basa Muka Kujuk ke ditutup ngena pua kumbu sereta dalam Kujuk nya selalu iya deka diengkah barang pemakai.
Iya madahka, enti kelia mayuh macham chara dikena orang Muka Kujuk, tang serak tu nitihka singkang dunya ke majak moden enggau ngelimat jam dia Premier Sarawak dijangka deka Muka Kujuk lalu nyuaka pemeri nengah ‘Sarawak Pay’ aja.
“Nyadi pengawa ti disebut Muka Kujuk iya nya dalam Kujuk nya bisi ngundan barang baka pemakai enggau ai irup sereta ditutup ngena pua kumbu.
“Udah nya, enti deka muka nya kelia orang ngena mayuh macham chara nyengkaum ngena jaku dikena Muka Kujuk nya.
“Serak tu dikena ngemandakka jam maya Program Niti Daun tu dia Premier Sarawak Datuk Patinggi Tan Sri Abang Johari Tun Openg semina ngena telefon aja (scan nyuaka pemeri) lebuh udah Muka Kujuk tu,” ku iya.
Sikie ke mega Chairman Komiti Besai Program Niti Daun mansutka penerang nya rambau dirandau ba Program Dialog TVS: Niti Daun ‘Serlah Keharmonian Pelbagi Kaum’ dipancharka terus nengah TVS, malam tadi.
Nangkan ke nya, ngelansa pasal pengawa Muka Kujuk nya Sikie nerangka, nya senutuk enggau polisi perintah ti ngemeranka pemansang digital dalam ngatur pengawa.
Pia mega iya madah pengawa bukai ke bisi diatur maya nya ila, nyuaka perais ngagai empat kontinjen pemadu manah ungkup program Niti Daun 2023.
Bisi 91 buah kontinjen ngambi bagi ba program Niti Daun serak tu lalu kontinjen ti ngempu gelar champion maya tu ila deka nerima perais sepenyampau RM10,000.
Ungkup penemu, raban penyereta berengkah ngerejister diri ungkup program tu berengkah pukul 10 pagi lalu pengawa disadang tembu pukul 4.30 lemai.-TVS
