KUCHING, 16 Jun: Gerempung Ngajat Asal Iban (NGASI) deka mantaika maskot ‘Indai Abau’ beserimbai enggau Program Niti Daun 2023 ti diatur kena 17 Jun 2023, Hari Enam tu.
Chairman NGASI Bartholomew Sirow Chong madahka nya entara siti penyelai ti deka dibantaika raban sida sereta dikearapka narit ati bala mayuh ke ngambi bagi enggau meda program nya.
“Baka ke ditemu kitai Indai Abau tu kelia suah dibantaika ba rumah panjai dikena ngemba bala anak mit ngambika sida enda kelalu manchal tauka dikena ngerichahka pengerami.
“Nyadi, serak tu kami ari raban NGASI deka mai dua iku orang ke nyadi Indai Abau tu,” ku iya madah ngagai pemberita TVS.
Bartholomew nerangka bala mayuh enggau nembiak lebih agi sida ari mengeri tauka bansa bukai ulih meda nama ti dikumbai orang Indai Abau.
Nangkan ke nya, Chairman Kelab Ngepan Betong (KNB) Sigat Sang madahka serak tu sida masuk dalam Raban N.36 Layar Betong ti nyerangkung 23 iku raban KNB, 25 iku ari Gerempung Tuai Rumah, tujuh iku ari Sarakup Indu Dayak Sarawak (SIDS) pampang Betong, enggau sekeda raban bini-bini bala menteri, pengari rayat di Betong sereta tuai peranak ke bukai, lalu penyampau semua ke ngambi bagi ari raban tu iya nya 65 iku.
“Nyadi kami raban ari Raban N.36 Layar Betong deka ngambi bagi dalam pengerami Niti Daun di Kuching laban kami deka ngayan enggau mandangka nama reti segulai sejalai ke bendar.
“Kebuah pia munyi ke disebut aku tadi, raban kami ukai semina mai bansa kitai Dayak aja tang bisi bansa China enggau bansa bukai sama ngambi bagi sereta kami deka mandangka kami ulih segulai sejalai enggau pangan diri dalam semua pengawa,” ku iya.
Entudi ke nya, Chairman Sarawak Dayak National Union (SDNU) pampang Kuching, Thadeus Ling Allu madahka sida bisi nganjung 18 iku pengari ngambi bagi dalam Program Niti Daun ujung minggu tu.
‘’Nyadi kitai Dayak lebih agi kitai Iban anang muai peluang mandangka main asal kitai lebih agi ngepan asal bansa kitai ngambi ulih dipeda bansa bukai baka temuai ti datai ari menua luar,” ku iya.
