BAU, 11 Jun: Pengawa nanam kopi ngembuan penau besai diangkat nyadi pun penatai pemisi rayat lebih agi sida ke diau ba sitak  Puncak Borneo enggau Serembu.
Sapit Menteri Industri Pemakai, Komoditi enggau Pemansang Wilayah Sarawak, Martin Ben madah, pendiau rampa menua ba sitak ke mayuh bebukit diperati chukup engkeman endur nanam kopi.
Ku terang iya, perintah seruran tebuka dikena mantu peranak menua ngemansangka utai tanam nyengkaum kopi.
Taja pia pengawa nya mesti tetangkupka peminta ungkup tuju komersial.
“Komuniti ditu lebih nemu utai ke deka digaga sida lalu kitai ari Perintah endang bisi program ke bekaul.
“Tang kitai deka nemu nama utai ke deka digaga sida, nama pengelandik sida ngambika kitai ulih nempa industri ari pengawa nya,” ku iya.
Martin ke mega Kaban Kunsil Nengeri (ADUN) Kedup mansutka pekara nya rambau Pengerami Ngelaluka Pengabang Gawai Kunsil Nengeri (DUN) Serembu diatur ba  Kampung Gumbang, ditu kemari.
Berebak enggau nya, Martin madah perintah Sarawak mega sedia mai serikat besai ngemansangka pengawa nya dikena mantu raban orang bumai nyadi pengeluar barang mata ngagai serikat ke bekaul.
Sama bisi datai ngulu pengerami nya ADUN Serembu Miro Simuh, ADUN Machan Allan Siden Gramong enggau Kaban Parlimen Puncak Borneo Datuk Willie Mongin.-TVS
