KUCHING, 18 Mei: Perintah Sarawak sedia meri insentif ngagai genap midul ke diulih raban atlit nengeri ba Lumba SEA 2023 Kemboja.
Menteri Nembiak, Lumba enggau Pemansang Dagang Sarawak Dato Sri Abdul Karim Rahman Hamzah madah, perintah deka ngungkupka perais ngagai atlit ti udah ngangkatka nama Sarawak nengah lumba ke dikelala baka Lumba Asia, Lumba Komanwel, Lumba Olimpik enggau lumba dunya ke bukai.
“Insentif nya kitai (Sarawak) mega nganti, kitai enda ulih ngelui ari insentif ke diberi perintah besai laban perintah besai pan bisi meri insentif.
“Sida bepekit ukai ngarika Sarawak tang ngarika Malaysia nyadi lebuh sida menang bulih lumur satu, dua tauka tiga dia Perintah Malaysia deka meri sepenyampau insentif.
“Ambika banding (bulih) midul emas ungkup Lumba Olimpik sejuta lalu ungkup lumba bukai iya deka majak kurang.
“Taja pia Sarawak selalu iya deka meri setengan ari penyampau ke diberi perintah besai,” ku iya.
Abdul Karim madah munyi nya maya dipinta meri timbal pasal perais ungkup atlit Sarawak ke bisi bulih midul ba Lumba SEA 2023 Kemboja di Phnom Penh apin lama ke udah.
Sebedau tu, Premier Sarawak, Datuk Patinggi Tan Sri Abang Johari Tun Openg madah, pekara nya deka diterangka Dato Sri Abdul Karim Rahman Hamzah enggau silik laban iya ke nyadi menteri nguasa pekara nya.
Entara anak Sarawak ke udah nempa nama ba Lumba SEA tu tadi iya nya Grace Wong (Nikau Tukul Besi) sereta dua atlit terejun iya nya Kimberly Bong enggau Enrique Maccartney Harold bela bulih midul emas ba main nya.
Gimnas Ally Hamuda Abdullah bela nyulut sepengudah pulai mai dua midul engkeraju taja keterubah iya ngambi bagi ba Lumba Asia Tengara nya. -TVS
