KUCHING, 11 Mei: Pemisi loji kuasa gadung bepelasarka lukut di Sejingkat ti bisi daya ngeluarka 45 tan Minyak Injin Bilun ke Meruan (SAF) di serata dunya sereta ulih nambahka asil penatai pemisi Sarawak enti nyema SAF nya dijual chara komersial.
Dekan Fakulti Sains Sosial dan Kemanusiaan Universiti Malaysia Sarawak (UNIMAS), Prof. Dr. Neilson Ilan Mersat madah, pemisi loji nya mega ulih nyendiaka peluang gawa ngagai rayat menua tu, lebih agi sida ke sigi bisi pengelandik dalam bidang nya.
“Nyadi tu ulih nyendiaka peluang gawa ngagai anak Sarawak lebih agi sida ke bisi pemandai enggau pengelandik nguna teknologi ke bekaul.
“Pia mega, sida ke nadai pengelandik diberi latih ngambika sida ulih nangkup pengawa dalam bidang nya,” ku iya.
Berebak enggau nya, Dr Neilson nerangka pemisi loji tauka industri nya ba menua tu ulih matak kompeni ari menua luar meranak puku ba dalam pemansang kuasa gadung tu ti meri penguntung ke besai.
“Pekara tu mandangka perintah Sarawak menatika senentang chara ke pemadu manah dikena nambahka asil penatai pemisi nengeri sereta ngemeratka guna teknologi dalam ngemansangka ekonomi,” ku tandu iya.
Iya mansutka jaku nya rambau dipinta meri timbal penemu senentang pemanah enggau penguntung ti ulih diterima nengah pemisi loji bekal kuasa gadung lukut di Sarawak.
Kelimpah ari nya, iya madahka asil penatai ke diterima Sarawak ari kuasa gadung nya ulih dikena perintah nambahka sereta ngemanahka agi pemansang rayat sekalika ari sukut infrastruktur, ekonomi sereta peluang gawa dalam sektor ke bekaul.
Ungkup penemu sebedau tu, Premier Sarawak Datuk Patinggi Tan Sri Abang Johari Tun Openg rambau bejadika program bejadika Chitose Carbon Capture Central Sarawak ba loji kuasa Sejingkat Sarawak Energy madahka Sarawak ulih nyadi perintis ungkup teknologi pemansang lukut ti ngembuan potensi ke besai ulih nyungkak ekonomi menua tu. – TVS
