SIBURAN, 8 Mei: Mensia mayuh dilalau patut ngemeratka pemeresi ba kandang rumah enggau patut nentuka kandang rumah sida enda kelalu repa dikena nyeliahka penusah angus.
Tuai Balai Bomba enggau Penyelamat (BBP) Siburan, Nazry Mohamat madahka, chukup beguna mensia mayuh nyikap diri enggau penemu nagang penusah angus lebih agi diatu benung musin rangkai.
“Ngagai mensia mayuh terenak pemereti ati sentang empas ari penusah angus.Pemadu manah dalam rumah patut bisi disediaka siti tauka dua iti kereban pemadam api,” ku iya rambau ditelefon pemberita TVS lebuh Hari Satu.
Ku iya, tuju tu ngambika komuniti ulih ngambi atur tumu nguna kereban nya seraya nganti raban penyelamat datai ngesah penusah.
Kelimpah ari nya, atur ke patut diambi mensia mayuh iya nya chara nyeliahka penusah angus dalam rumah enggau mega di luar rumah.
“Chara nyeliah ba luar rumah iya nya ngemeranka gaya rampa ke manah, beresi kandang endur luar rumah ngambika nadai rumput, babas, lalang enggau uras.
“Seliahka ari ngempuru ba siti endur laban kitai nemu lebuh musin rangkai tu gaya hari angat nya entara tiga elemen ti ulih ngujungka penusah angus nyadi,” ku iya.
Ku iya, nyema kandang rumah repa enggau babas, lalang sereta rumput rangkai deka ngemudahka agi penusah angus nyadi.
Ambika chunto, papung insap enda dipadam manah dibuai ngagai babas ke rangkai entara faktor penusah angus ti ulih ngerampit ngagai rumah. – TVS
