MIRI, 3 Mei: Perintah Sarawak udah ngaga pemutus sedia ngagihka bantu sepenyampau RM70,000 sepintu ngagai rumah panjai tauka genturung pendiau ti dituntung penusah angus dikena sida ngentak rumah baru.
Sapit Premier Sarawak Datuk Amar Douglas Uggah madah perintah enda kala nyebut bantu nya tang sehari tu iya patut madahka pekara nya ngagai bala mayuh baka ke udah disetuju Premier Sarawak Datuk Patinggi Abang Johari Tun Openg.
“Perintah setuju ngungkupka rumah panjai tauka genturung pendiau ke dituntung penusah angus bantu sepenyampau RM70,000 sepintu.
“Nyadi ditu (Long Selaan) bisi 12 pintu kala dituntung penusah angus (8 June 2020) nyadi sida ulih nerima bantu sepenyampau RM840,000,” ku iya.
Uggah ke mega Chairman Komiti Penyangga Penusah Nengeri (JPBN) Sarawak mansutka pekara nya maya bejadika Rumah Panjang Long Selaan, (Belukun) Baru di Baram, pagi tadi.
Sama bisi datai Kaban Kunsil Nengeri (ADUN) Mulu, Datuk Gerawat Gala.
Berebak enggau nya, Uggah ngelalau raban ke tasah angus patut ngaga ripot lengkas ngagai Pegawai Pelilih ngambika atur bekaul ulih digaga.
“Kitai endang besampika semua orang nadai apa nama (likun) lalu enti penusah (angus) nyadi kitai minta sida ke dituntung penusah patut madah lengkas ngagai Pegawai Pelilih ngambi ulih bejalaika atur ke bekaul.
“Nya alai, ari sukut pejalai pengawa aku minta opis-opis pelilih enggau opis residen kereja mih pengawa enggau jampat laban ke orang ke udah dituntung penusah begunaka rumah baru.
“Enti peminta laun nyadi nya deka ngeruga pemanah nama perintah,” ku iya.-TVS
