KAPIT, 15 April: Raban Penyaga Orang Periman Malaysia (APM) ngembuan tangkup pengawa ke besai dalam nyaga pengelikun mensia mayuh lebih agi lebuh bisi penusah ngenyit nyadi baka penusah ampuh bah, tanah tusur enggau ke bukai.
Sapit Menteri ba Opis Menteri Besai (Nyaga Pekara Sabah, Sarawak enggau Pengawa Khas) Datuk Wilson Ugak Kumbong madahka, nya kebuah aset logistik baka perengka pengangkut dikena ngelancharka operasyen ngesah penusah sekalika penusah ngenyit tauka kes emejensi mesti chukup lebih agi di kandang menua pesisir nyengkaum di pelilih Kapit.
“APM iya nya siti tim ‘first responder’ lebuh betapi enggau kes emejensi enggau penusah ngenyit,” ku iya.
Iya mansutka jaku nya rambau dirandau pemberita TVS, sehari tu tadi.
Berindik ari nya, Ugak ke mega Kaban Parlimen Hulu Rajang madahka raban APM patut nyikap diri ari semua sukut dalam operasyen nyelamat enggau napi sebarang penusah ngenyit.
Dulu ari tu, Ugak bisi ngatur penemuai ngabas Opis Raban Penyaga Orang Periman Malaysia (APM) pelilih Kapit kena Hari Lima.
Ku iya, tuju penemuai nya laban deka bejalaika pengawa matau aset, perengka pengangkut logistik sereta gaya rampa opis APM di pelilih Kapit.-TVS
