KUCHING,10 April: Jaku Iban nyadi siti pelantar ti beguna dikena kitai bekomunikasyen enggau pangan diri nyadika tanda identiti bansa Iban meruan bisi nguan dunya tu.
Makin hari, jakuIban nyau majak idup sereta mansang ketegal bisi pengerindu, pengangkun ke jaku tu ukai semina diguna dalam komuniti Iban aja tang mega diguna
Siku pengajar ke gawa ba Opis Pelajar Nengeri (JPN) Sarawak Harold Unsie madahka, nya kebuah jaku Iban ngembuan tikas komersial ke tinggi enggau bisi penau ulih nyadi jaku komunikasyen ba renggat global.
Seriris enggau pemansang jeman diatu, jaku iban diperati udah jauh amat mansang enti dibanding 20 taun ke udah.
Kebuah pia, laban Jaku iban sama bela bisi segenda nyeruga baka bansa bukai di dunya tu.
“Enti suba sida tu tadi semina pengajar nyadi diatu bisi pengelicha enggau professor, nyadi nya nunjukka jaku Iban tu udah jauh nyulut,” ku iya rambau dirandau pemberita TVS, empai lama.
Ketebal agi jaku Iban semina ditemu ba siti raban komuniti aja, tang diatu Jaku Iban diguna dikena nangkup peminta industri baka media, pengawa puang, nyengkaum ba bidang pelajar di universiti.
“Nyadi, enti suba jaku Iban tu semina ditaburka nengah radio ke mina didinga kitai di Sarawak tauka naka menua Malaysia aja tang pengudah bisi perintah Sarawak nyendiaka palan TV (TVS) diatu utai nya udah ngelui tikas nya laban udah bisi ‘online’ ulih didinga orang serata dunya,” ku iya.
Berindik ari nya, Harold arapka nembiak rebak baru ulih ngentap enggau ngelatika jaku Iban standard ngambika terus dikelala bansa bukai.
Nya kebuah, bansa kitai iban ti gawa ba opis perintah, kompeni tauka gawa kediri empu patut nyukung pemansang jaku Iban enggau ngerembaika nya ngagai tikas ke lebih tinggi. – TVS
