ARAU, 6 April: Pengawa bedajaka raban graduet Pelajar Teknikal enggau Latih Vokasional (TVET) ba baruh Opis Menteri Pemansang Tumpuk Pendiau enggau Wilayah (KKDW) terus dikerembai berindik ari tikas kemaya hari udah nyapai 90 peratus.
Pekara nya dipansutka Sapit Menteri Besai Datuk Deri Dr Ahmad Zahid Hamidi, seraya madahka naka tu bisi 280 institusyen TVET ba baruh KKDW sereta ejensi opis menteri nya.
“Tu nyerangkung bidang neriki bilun, ke udah mujur nyapai 98.4 peratus.
“Nyadi tu mih pekara ti deka dipandangka ngagai komuniti senentang pengawa meranak puku ti dipejalaika perintah nengah TVET, lebih agi ba baruh KKDW ke deka meri asil ke pemadu manah,” ku iya madah.
Ahmad Zahid mansutka jaku nya rambau ngulu Program Santunan Kasih Ramadan KKDW di Arau lebuh Hari Tiga.
Beduduk enggau nya, iya ke mega Menteri Pemansang Tumpuk Pendiau enggau Wilayah nerangka, peminta ke nguna graduet TVET diatu majak nambah sereta bisi sekeda sida bulih gaji tauka asil penatai pemisi ke tinggi ti dibanding pekereja dalam bidang ukai teknikal sereta pengelandik.
Ku iya madah sekeda menua maju baka Jerman, Jipun, Korea Selatan enggau Amerika Syarikat menggi raban teknokrat dalam sektor industri ti ditempa nengah bidang TVET.
Berindik enggau nya, Ahmad Zahid madahka rayat mesti mereti senentang guna pelajar TVET enggau ukai semina dikerengkun nembiak ti kurang nyulut dalam bidang akademik.
