BETONG, 6 April: Pengawa nguna kereban teknologi moden dikena nganchurka tugung uras di kandang menua pesisir patut dikerembai.
Nya entara perambu ti dibantaika Sapit Premier, Datuk Amar Douglas Uggah Embas, seraya ngelalau anang kelalu ngandalka palan alai muai tauka nugungka uras aja.
Iya nyemetak madahka pengawa baka nya tau ngeruga pemeresi rampa menua dalam timpuh ke panjai tebal agi, ba endur pasar, genturung pendiau sereta rumah panjai.
“Sistem kemaya hari tu ti deka dikerembaika ba menua pesisir udah enda manah dikena,” ku iya madah.
Uggah nerangka, endang patut teknologi moden ke baru ti lebih menyana dikena kitai nganchurka uras, lebih agi uras ke enda ulih diinjin.
“Uras ke ulih diinjin tau dianjung terus ngagai kompeni ke bekaul.
“Enti nyema kitai bisi perengka guna ke lebih moden, kitai ulih ngerembaika teknologi tu ngagai kaunsil bukai di serata nengeri,” tandu iya.
Beduduk enggau nya, iya madahka enti nyema bisi perengkaguna ke lebih moden dikena di Betong, nya tau dikerembai ngagai kaunsil di pelilih bukai baka di Saratok, Lubok Antu sereta Sri Aman.
Iya mansutka jaku nya pengudah ngemataka pengawa angkat sumpah 33 iku kaban Kaunsil Pelilih Betong ti diuluka Chairman Kaunsil Pelilih Betong, Alfred Galing Ason.
Nangkan ke nya, Uggah madahka raban kaunsil tau beratika senentang perambu nya sereta mai pekara nya ngagai Premier, Datuk Patinggi Tan Sri Abang Johari Tun Openg.
Ba lansa ke sama, iya minta Opis Menteri Pengerai Mensia Mayuh, Pengawa Berumah enggau Perintah Lokal ngungkupka mayuh turu dikena bejalaika pengawa mutarka tugung uras di menua pesisir. – TVS
