KUCHING, 3 April: Sarawak diuan rayat pupu bansa, budaya, enggau pengarap lalu penyerakup nyadi pugu pengelantang jemah ila, ku Sapit Premier Sarawak, Datuk Amar Douglas Uggah Embas.
Iya madah, nengah pengawa ngaku serakup baka mensia enggau bebendar mai komuniti sama bebasaka pangan diri sereta nepis sebarang pekara ke nekul ukai semina ngaul bida pengarap, tang mega ngelui ari penanggul rama enggau bansa.
“Beduduk ari nya, kitai ngasaika genap pengerami komuniti pupu bansa ari mayuh pengarap di Sarawak nyadi siti peluang dikena negapka budaya kitai enggau ba awak ke sama mega ulih belajar enggau ngerami budaya bansa bukai.
“Aram mih kitai terus berandau enggau pangan diri nadai ngira bansa enggau pengarap ke dipegai kitai,” ku iya rambau Pengerami Ngintu Taun Baru Komuniti Baha’i di sebuah hotel ditu, malam ensana.
Teks jaku iya dibacha Sapit Premier Sarawak, Dato Sri Dr Sim Kui Hian ti ngarika iya ba pengerami nya.
Sama datai, Sapit Sekretari Perintah Sarawak (Adminstrasyen), Datu Buckland Bangik enggau Direktor Unit Pekara Pengarap Bukai (UNIFOR), Datu Jack Aman Luat.
Ngelansa pasal pengerami nya, Uggah madah, sejarah pengarap Baha’i di Sarawak udah berengkah kenyau taun 1951 lalu sehari tu, urung 50,000 komuniti Baha’i Sarawak bisi ba dedini endur kelimpah 401 kandang endur ke bisi ba nengeri tu ngarika peranak pupu bansa, budaya enggau sosio-ekonomi.
“Komuniti tu nyengkaum Iban, China, Bidayuh, Melanau, Kayan, Salakau, Penan enggau India.
“Di Sarawak, komuniti Baha’i ngerami (taun baru) nengah rumah tebuka enggau begempuru ba sebuah rumah panjai tauka genturung pendiau enggau mega ba sitak mengeri,” ku iya.
Komuniti Baha’i ngintu pengerami nya kena 21 Mac tu tadi pengudah bepuasa pengelama 19 hari berengkah ari 2 nyentuk 20 Mac. -TVS
