TANJUNG MANIS, 27 Mac: Penyikar raban bomba mujur mantu siku nembiak mit ke tepuruk ba salur ai dalam bilik agu ba sebuah rumah pengereja pengawa ditu, pagi tadi.
Pemangku Tuai Balai Bomba enggau Penyah Penusah Tanjung Manis, Pegawai Bomba Kanan I (PBKI) Awang Busrah Awang Mostapha madah, penusah nyadi urung pukul 6.00 pagi ditemu indai tudah nembiak mit ke beumur setaun nya sebedau ke nguji matak kaki anak iya ke tepuruk.
“Taja pia, iya enda mujur (matak kaki) lalu ngujungka iya betelefon minta saup raban bomba.
“Bomba Tanjung Manis nerima kangau nya urung pukul 8.13 pagi sebedau ngerah raban ngesah penusah nya,” ku iya nengah sebengkah penerang.
Iya madah, datai ba endur nya, bomba terus mangkung lantai enggau paip nguna kereban khas ngambika kaki nembiak mit nya nyamai ditarit.
“Operasyen tembu pukul 9.55 pagi dikereja enggau belubah awakka kaki tudah enda bakal,” ku iya.
Pengudah nentuka palan nya likun raban bomba mupuk pulai baru ngagai balai.-TVS
