KUCHING, 20 Mac: Main elektronik tauka dikumbai e-lumba deka dipekitka ba Lumba Lalaysia (SUKMA) 2024 ti ditaga diatur ba Sarawak.
Pekara nya dipansutka Menteri Nembiak, Lumba enggau Pemansang Dagang Sarawak, Dato Sri Abdul Karim Rahman Hamzah, seraya madah pekara nya udah disetuju semua raban nyengkaum Menteri Nembiak enggau Lumba, Hannah Yeoh.
“Kitai nemua iya nya e-lumba endang siti main ke chukup jampat angkat.
“Nya alai, sepengudah dikerandau enggau semua komiti lumba nyengkaum Menteri Nembiak enggau Lumba Malaysia, enggau aku empu ke nyaga nembiak enggau lumba ba Sarawak, sereta mega Menteri Nembiak enggau Lumba ari Sabah, kami bela setuju ngeletak e-lumba nyadi siti ari main ti deka dipekitka ba lumba Sukma ba taun baru,” ku iya.
Iya madah munyi nya maya bejadika Pengawa Nutup enggau Nyuaka Perais Pekit My Borneo e-Force Invitational 2.0 di sebuah hotel tebilang ditu, kemari.
Nerang silik, Abdul Karim madah raban sida mega ngarapka kerejasama raban peribit ti bekaul enggau industri e-lumba dikena nentuka pemujur main nya ila.
“Sektor peribit ti mantu ngemujurka e-lumba deka dikangau ngambika meri kerejasama sebedau SUKMA berengkah laban kami begunaka sukung sektor peribit endur mantu,” ku iya.
Tandu iya, raban sida bedau milih palan pekit, tang melabaka deka milih palan ke kala endur ngatur e-lumba ba sitak Kuching.
Ke penemu, tu kedua kali e-lumba dipekitka ba SUKMA nangkan iya ti keterubah ba SUKMA 2022 di Johor.
Ba pekit keterubah suba ngemataka bisi lima main dipekitka lalu ngemataka kontinjen ari Terengganu mujur nguasa pekit nya.-TVS
