MUKAH, 20 Mac: Delta Rajang bisi penau nyadi siti agi sitak ekonomi baru ke ulih ngasilka penatai pemisi ngagai Sarawak.
Taja pia, ku Premier Sarawak, Datuk Patinggi Tan Sri Abang Johari Tun Openg naka tu, pengawa ngemansangka penau nya agi ba tikas perambu.
“Ejensi pemansang Delta Rajang (RADDA) ti betuaika Datuk Len Talif Salleh benung chakah bejalaika pansik pasal penatai ekonomi baru nya.
“Aku bedau ulih madah dulu tang Datuk Len nemu bisi pekara ti deka digaga aku tang enda ulih dipadah diatu. Siti penatai belanja deka datai ari sitak tu,” ku iya.
Iya madah munyi nya maya pengawa bejadika Stesyen Minyak Petros di Daro, kemari.
Abang Johari madah iya enggai napuk pekara nya tang irau bisi sekeda raban deka nuduh iya bula nyema enda bejalaika perambu nya.
“Awak ke aku ngatur tu enggau terenah dulu, tu deka ngasilka penatai pemisi ngagai Sarawak laban iya endang ekonomi baru.
“Nya mih ‘ulu lunga’ ngagai entelah ke dibantai aku bekaul enggau perambu tu,” ku iya.
Berebak enggau nya, Abang Johari mega madah perintah nengeri udah ngaga pemutus deka ngemansangka begunan opis pelilih baru di pelilih nya nyerumba ngintu taun penumbuh pelilih Daro.
“Opis Pelilih tu deka disikap enggau mayuh perengkaguna nyengkaum servis Mesin Wang Automatik (ATM) sereta kuarters pegawai.
“Kuarters tu deka disikap enggau perengkaguna besenam enggau palan dobi dikena ngemuntangka pegawai ke gawa ditu, konsep begunan Opis Pelilih Daro tu mega deka dikerembai ngagai sitak bukai dudi hari,”ku iya.-TVS
