KUCHING, 5 Mac: Nembiak rebak baru diperansang anang lembau belajar nebah gendang pampat ngambika main asal nya terus idup sereta meruan dipeda rebak dudi.
Chairman Gerempung Gendang Pampat enggau Main Asal Iban Kuching, Donald Bada madahka, gendang pampat patut suah agi dipandangka awakka iya terus dikelala pupu bansa di serata dunya.
“Orang ke rebak baru anang enggai belajar nebah gendang pampat. Kebuah pia laban tu endang gendang asal kitai kelia.
“Patut idupka baru main asal tu ngambika iya enda punas dudi hari. Awakka nembiak rebak baru ulih ingatka gendang pampat tu,” ku iya.
Donald mansutka jaku nya rambau Pengerami Ngintu Penumbuh Gerempung Gendang Pampat enggau Main Asal Iban Kuching Taun Kelima, di sebengkah hotel tebilang ditu, kemari.
Udah nya, Donald madah tuju patut belajarka main gendang pampat tu mega dikena nyagu, ngangkat enggau ngetanka main asal nya ari lenyau diserunyut arus pemansang.
“Aku ngarapka dudi hari ila, nembiak rebak baru anang lembau belajarka gendang pampat tu.
“Enti orang tuai udah nadai, dia orang ke udah belajarka gendang pampat tu ulih ngajar nebah gendang pampat ngagai sida ke biak agi. Nyadi ari nya gendang pampat tu deka enda punas ngapa jemah,” ku iya.-TVS
