MIRI, 26 Feb: Subsidi sepenyampau RM209 juta diberi ngagai perengka pengangkut langit menua pesisir endang beguna amat, lebih agi ngagai nengeri Sarawak.
Menteri Perengka Pengangkut, Datuk Seri Lee Kim Shin madah, pekara tu beguna amat beduduk ari ‘Rural Air Services’ (RAS) dikena ngelawa sitak menua ulu ketegal ti nadai ulih dilawa ngena perengka pengangkut darat.
“Subsidi RAS ukai pekara baru lalu Maswings diatu beoperasi ngena subsidi tu.
“Kitai nemu sekeda endur ba Sarawak lebih agi ba kandang tanah tinggi di menua Miri endang nadai jalai raya besambung enggau mengeri-mengeri ke semak.
“Nya alai, rayat kitai chukup bepanggai ngagai jalai langit menua pesisir , lalu tu chara jampat dikena ngelawa mengeri.
“Nengah RAS Maswings mega deka terus nyendiaka servis pengangkut langit ngagai peranak ba sitak ke diau jauh ba menua ulu enggau tanah tinggi,”ku iya meri timbal bekaul enggau Bajet 2023 ke baru udah dibantaika Menteri Besai, Datuk Sri Anwar Ibrahim ba Parlimen, Hari Lima.
Kim Shin ke mega Kaban Kunsil Nengeri (ADUN) Senadin madah ukai semina nya aja, iya mega meri pengaga ati ngagai berita Bajet 2023 iya nya masang tanjak kerusi roda ba tujuh buah padang bilun ba Sabah enggau Sarawak.
Ku iya pekara nya mega beguna dikena ngemuntangka raban penguna lebih agi orang ke timpang pendiau.
“Kitai mesti nyendiaka perengkaguna ke mantu penguna mngkur semua raban nyengkaum Orang Timpang Pendiau (OKU) enggau mobiliti mit.
“Aku pechaya perengkaguna baka tu ulih ngemuntangka pemindah penumpang enggau lebih likun ba padang bilun enggau maya ngelawa bilun,” ku iya.-TVS
