SIBU, 19 Feb: Unit Pekara Pengarap Bukai (UNIFOR) deka mantu nyeruri pendam lama di kandang menua pesisir lalu deka nyadi siti agi singkang ke baru digaga dikena ngerembaika tanggungpengawa unit nya.
Menteri Industri Pemakai, Komoditi enggau Pemansang Kandang Menua, Dato Sri Dr Stephen Rundi Utom madahka pekara nya endang patut dipejalaika laban mayuh pendam lama ke dipenggi komuniti Iban di nengeri tu repa, enda diintu.
“Beduduk enggau nya, UNIFOR ti ba baruh jaga Sapit Premier Sarawak Datuk Amar Douglas Uggah Embas udah setuju deka ngerembaika bantu UNIFOR ngagai pengarap lama nyerengkung nyeruri pendam lama ngambi ke lebih likun,” ku iya madah rambau dirandau dalam aum media pengudah nyuaka chek UNIFOR ngagai tujuh sekula misyen di Sibu, Meradong enggau Sarikei empai lama.
Dr Rundi ke mega Kaban Kunsil Nengeri (ADUN) Kemena nerangka, taja pan diatu udah bisi pendam moden baka Taman Peringatan Nirvana enggau ke bukai, pendam lama mega mesti deka diintu manah.
“Kelimpah ari meri bantu ngagai orang ke bepengarap Kristian, UNIFOR mega mantu orang ke agi megai pengarap lama nyengkaum bantu duit,” tandu iya.
Iya madahka, semua nya ulih dipinta pengari ba siti-siti kandang endur lalu UNIFOR deka meri bantu bepelasarka peminta ke diterima.
“UNIFOR sigi komited deka nentuka semua bantu ke bisi disediaka ulih mantu semua renggat komuniti di nengeri tu,” ku iya madah agi.
Tujuh buah sekula di sitak Sibu enggau Sarikei udah nerima bantu perintah ke ngaul sekula misyen ari UNIFOR ke nguna belanja sepenyampau RM826,770.
Sama bisi ngulu program nyuaka chek nya Kaban Kunsil Nengeri (ADUN) Pakan Tan Sri William Mawan Ikom, Direktor Opis Betanam Betupi Nengeri Sarawak Dominic Chunggat sereta Sapit Residen Bagi Menua Sibu Christopher Ranggau Unting.-TVS
