KUALA LUMPUR, 13 Feb: Yang di-Pertuan Agong, Al-Sultan Abdullah Ri’ayatuddin Al-Mustafa Billah Shah madahka diri berasai gaga enggau pemujur pejalai projek Projek Renggat 1 Jalai Raya Pan Borneo di Sabah enggau Sarawak.
Al-Sultan Abdullah mega madahka pengingin diri deka deriba neresa arung jalai raya nya ila.
Ku iya, program pejalai nya benung dilangkar Istana Negara nengah kerejasama Perintah Besai, Perintah Sabah enggau Perintah Sarawak.
“Endang udah nyadi juluk Aku deka deriba neresa Jalai Raya Pan Borneo tu lebih agi ngambika Aku lebih ngelala sereta beteleba enggau rayat Aku ba menua pesisir di Bumi Kenyalang enggau Nengeri Bawah Bayu,” ku jaku Al-Sultan Abdullah maya mantaika Pesan Diraja nyerumba Pengawa Beradat Muka Penggal Kedua Parlimen ke-15 ditu, tadi.
Pengawa ngaga Jalai Raya Pan Borneo berengkah taun 2015 lalu dipelaba tembu penuh 2024. -TVS
