BUKIT BEGUNAN, 7 Feb: Kereja Kunteriktor enggau Ngemanah Jalai Raya Pan Borneo (LPB) Fasa 1 Simpang Pantu Ke Batang Skrang Ke Mungkur Seksyen Bukit Begunan deka tembu bulan november tu ila.
Menteri Kereja Raya Datuk Seri Alexander Nanta Linggi madah projek nya ditaga tembu bulan June tu tang penusah tanah tusur ke nyadi maya pengawa ngaga jalai raya nya ngujungka pelin asal diubah baru kelimpah timpuh tembu pan diinsur.
“Ba seksyen tu maya pengawa nya dikereja kala nyadi tanah tusur lalu tanah timbuk ditukar ngagai timbuk batu nyadi penyampau nya umbas iya pemayuh lalu timbuk batu tu tadi patut digaga dikena negapka agi struktur tanah ba endur nya,” ku iya nengah sebengkah aum pemberita pengudah ngabas projek LPB di Seksyen Bukit Begunan ditu, kemari.
Nangka ke nya, ku Nanta beguna amat pengawa ngemanah nya digaga meruan ngambika Seksyen Bukit Begunan ulih tembu enggau menyana kelimpah nentuka pengelikun sereta pengelantang raban penguna jalai raya.
Kelimpah ari nya, Nanta madah projek nya bisi implikasi ngagai pekara wang ti begunaka pemendar ari kabinet udah tu.
“Bisi nyadi implikasyen pekara wang, yang nya ukai penanggul besai laban pekara ke patut dikemerat iya pengelikun enggau pengelantang (penguna), lebih agi baka pengelikun, patut dikemerat, pengelantang sida ba jalai raya. Implikasyen belanja nya aku dipadahka dia urung RM100 juta, RM70 juta tu kitai deka minta pemendar ba kabinet ila,” ku iya.
Dulu ari nya, Nanta bisi mendingka taklimat dikenataika Tuai Unit LPB Opis Kereja Raya Sarawak, Awg Mohamad Fadillah Awg Redzuan pasal status pemadu baru projek jalai raya di sitak nya.
Kenu ku Awang Mohamad Fadillah, pengawa ngaga timbuk batu nya udah berengkah 8 April taun nyin kemari lalu deka negapka agi timbuk projek LPB sereta ngelengkas timpuh penembu projek nya.
Saran projek LPB serak tu iya nya ba Seksyen Bukit Begunan, Pakej Kereja (Work Package Contract – WPC) 04 – Simpang Pantu ke Jematan Batang Skrang urung 91 kilometer pemanjai bisi dibagi ngagai 2 seksyen iya nya Seksyen Bukit Begunan enggau Seksyen Sri Aman.
Naka bulan Januari 2023, rikod pejalai Projek Pakej Kereja (WPC) tu udah manggai 92 peratus lalu ditaga ulih tembu penuh bulan November 2023.-TVS
