KUCHING, 6 Feb: Gerempung Veteran Soldadu Kor Renjer (PVTKR) endang sebengkah gerempung ke chukup chakah bejalaika program komuniti lebih agi mantu kaban gerempung ke dituntung penusah.
Beduduk ari nya, Kaban Parlimen Sri Aman, Dato Sri Doris Sophia Brodie madah jasa enggau servis ke udah dipejalaika kaban PVTKR kelia patut seruran dikeingat lalu PVTKR patut nyelak mayuh agi bup pasal Sarawak Renjer.
“Bup nya chukup beguna lebih agi ngagai rebak baru awakka sida mereti enggau nemu pasal pengawa ke udah digaga raban veteran soldadu.
“Ari nya, sida deka lebih bebasa ke pengawa ke udah digaga raban Sarawak Renjer enggau Iban Trackers seraya nerenak ulah patriotik.
“Terima kasih besai ngagai nuju semua kaban PVTKR laban pemanah servis ke udah dipejalaika semua kita sekumbang ke gawa dulu suba.
“Pengawa kita chukup manah seriris enggau juluk besai neruska legasyen Rejimen Kor Renjer Diraja seraya bejalaika pengawa pengasih mantu komuniti,” ku iya maya Nutup Aum Besai Ke-7 PVTKR ke diatur ba sebengkah hotel tebilang ditu, ensana.
Naka tu, ku Doris PVTKR ngembuan lebih 1,000 iku kaban mungkur ex-Renjer Sarawak, Renjer Malaysia enggau Iban Trackers.
Gerempung nya chukup chakah bejalaika mayuh bengkah aktiviti kenyau ke udah berejister ba Opis Pengerejister Gerempung (ROS) urung tujuh taun ke udah.
Sama bisi datai Penyanding Penemu PVTKR Leftenan Jeneral (B) Datuk Stephen Mundaw enggau Presiden PVTKR, Leftenan Kolonel (B) Mohd Melintang Abdullah.-TVS
