BINTULU, 5 Feb: Program Kampung Siaga 221: Komuniti Kampung Berdaya Tahan Bencana (Skuad Komuniti Pertahanan Awam) udah dilanchar di rumah panjai.
Sapit Menteri ba Opis Menteri Besai (Pekara Sabah, Sarawak enggau Pengawa Khas) Datuk Wilson Ugak Kumbong madahka program nya keterubah diatur ti ngaul rumah panjai ba taun tu.
Ku iya, pemutus milih rumah panjai endang nemban berindik ari penyuah penusah angus ke nyadi ti nuntung rumah panjai sebedau tu.
“Enti kitai berati dalam rintai tu, berapa mayuh rumah panjai udah angus. Penemu tu datai ari aku ti nyadi pengari rayat ngambika pekara tu ulih nyadika teladan dikena nyeliahka penusah angus baka di sitak Hulu Rajang.
“Kitai nadai komunikasyen ke manah lalu perengka pengangkut mega jauh enggau tusah dilawa ejensi perintah lebuh bisi penusah angus,” ku iya.
Iya mansutka jaku nya rambau bejadika Program Kampung Siaga 221: Komuniti Kampung Berdaya Tahan Bencana (Skuad Komuniti Pertahanan Awam) di rumah panjai Jackson Wan di Tubau, kemari.
Ku Ugak, latih ti disediaka nengah program nya ulih mantu komuniti lebih agi peranak ti diau di rumah panjai nyikap diri napi penusah ngenyit nyengkaum penusah tanah tusur.
“Aku andal nengah pemisi latih ke dipejalai Raban Penyaga Periman Malaysia (APM) tu nerima sambut ke manah.
“Program tu mai reti ke besai ngagai komuniti enggau peranak ti diau ba rumah panjai di menua pesisir baka di sitak parlimen aku di Hulu Rajang,” ku iya.
Ugak mega nerang, program nya senutuk enggau juluk perintah penyerakup di baruh pegai Menteri Besai Datuk Seri Anwar Ibrahim ti ngarap ejensi perintah ngambi inisiatif ke sama baka APM.-TVS
