BETONG, 3 Feb: Siku baya tiga meter pemanjai ditangkap sepengudah kenyang makai umpan ginti ke ditan orang ke dipelabaka endang penginti baya nadai pemendar ba Sungai Layar enda jauh ari Kampung Hilir ditu, Hari Lima.
Penyadi nya ditemu siku lelaki beumur urung 50-an ti tekenyit meda ayas siku baya tekait ba mata ginti urung pukul 8.00 pagi.
Pegawai Penyaga Mensia Mayuh Pelilih (PPAD) Betong Leftenan (PA) Desem Samuel madah, raban sida nerima kangau tasah pasal baya ke ditangkap pukul 8.23 pagi.
“Udah nerima kangau nya, seraban bomba terus ngesah palan nya sereta mai kereban khas ke dikena nangkap baya.
“Seninjik datai ba endur nya raban kami bisi betemu siku pengani genturung pendiau lalu mai ngelawa endur baya ke tekait ba mata ginti sereta minta bantu nangkap enggau mindahka baya nya,” ku iya.
Ku iya, raban operasyen ngambi awak pengelama 20 minit sebedau baya nya dikatung ke darat.
Kenu ku Dasem, bepelasarka mata ginti ke kereban ke dikena manjuk baya nya, orang ke nya dipelaba endang orang ke landik nangkap baya.
“Sepengudah meresa mata ginti enggau kereban ginti ke dikena ngumpan baya nya, orang nya disadang chukup ‘profesional’ enggau landik nangkap ,” ku iya.
Ku iya, raban sida udah nya mai jelu nya ngagai markas APM Betong ngambika diperunding silik.
Ku iya, baya nya udah diserah ngagai raban Sarawak Forestry Corporation (SFC) ngambika dianjung ngagai Palan Nupi Jelu Siga Matang ba Taman Negara Kubah di Kuching. -TVS
