BINTULU, 31 Jan: Premier Sarawak Datuk Patinggi Tan Sri Abang Johari Tun Openg madah diri andal ngagai Samalaju Industrial Port SDN BHD (SIPSB) ulih bejalaika operasyen lebih 10 juta tan kargo nyerumba taun 2030.
Ku iya, pekara nya bepelasarka ari pemujur pengawa  palan penyangkai kapal nya sepemanjai taun siti nyin tadi.
Ku iya, serikat nya mega mujur numbuh, ngatur enggau bejalaika operasyen ba palan penyangkai kapal nya, tebal agi maya meri servis ngagai industri di zon industri Samalaju.
“Ungkup taun 2022, SIPSB udah ngeripotka asil operasyen sepenyampau RM 164.6 juta enggau pengulih ngeluarka kargo sepenyampau 6.6 juta tan. Tu senutuk enggau penumbuh tegap industri berat di Samalaju, ke alai palan penyangkai kapal nya deka bejalaika operasyen lebih 10 juta kargo nyerumba taun 2030,” ku iya lebuh bejaku ba Pengerami Makai Lemai Ngintu Ulang Taun  ke-10 Palan Penyangkai Kapal Pengawa Industri Samalaju ti diatur ditu kemari.
Berebak enggau nya, Abang Johari mega bisi ngemataka pengawa nyain Sempekat Pemereti Ati (MOU) entara SIPSB enggau Perbadanan Ekonomi Digital Sarawak (SDEC), Ocikumho SDN BHD enggau Kaunsil Pemansang Bintulu (BDA). – TVS
