BINTULU, 31 Jan: Perintah Sarawak deka ngatur aum enggau Perintah Besai ngambika ulih berundingka langgur deka ngempu Penyangkai Kapal Bintulu.
Ku Premier Sarawak, Datuk Patinggi Tan Sri Abang Johari Tun Openg, pengawa ngambi palan nya ari Perintah Besai awakka palan nya ulih diatur enggau dikemansangka nyadi palan penyangkai kapal nengeri seriris enggau strategi ke udah diperambu.
”Perintah Sarawak deka ngatur aum enggau Perintah Besai dikena nyilih Palan Penyangkai Kapal Bintulu nyadi palan penyangkai kapal dipenggi perintah besai ngambika palan nya ulih diatur sereta dikemansang nyadi palan penyangkai kapal nengeri nitihka strategi ti udah disebut aku tadi,” ku iya.
Ku Abang Jo, enti juluk nya ulih dijapai, pekara nya deka ngujungka perintah Sarawak ngembuan pelin besai dikena ngemansangka semua palan penyangkai kapal di Sarawak.
Ba pengerembai ke sama, ku iya, pekara nya ulih nentuka genap palan penyangkai kapal megai tanggung pengawa ngelakuka pengawa dagang enggau bedaja sereta nyungkak kaul pengawa kapal enggau hab perengka pengangkut sereta logistik global.
Kelimpah ari nya, ku iya, Perintah Sarawak mega deka meda Palan Penyangkai Kapal Bintulu nyadi sebagi ari kluster penyangkai kapal nengeri ba baruh Kaunsil Penyangkai Kapal Besai ti deka ditukuka nitihka undang-undang nengeri.
“Kaunsil Penyangkai Kapal Besai ke baru tu ila deka ngemanah enggau ngatur pengawa, operasyen, perambu enggau pemansang semua palan penyangkai kapal ti bepalan ba menua tu. Penumbuh nya mega ulih nentuka pengawa ngatur tarif palan penyangkai kapal enggau yuran ungkup semua palan penyangkai kapal di Sarawak,” ku iya agi.
Iya nerang, chaj Penyangkai Kapal Bintulu ti enda ditikika kenyau ari taun 1993, iya nya lebih baruh ari chaj penyangkai kapal nengeri, lalu tu ulih nukar chaj ari palan penyangkai kapal bukai ke nengeri tu.
Ku tandu Abang Jo, pekara tu taja pia besibil enggau saran ari Komiti Entara Perintah (IGC) ngambika nadai neritka yuran enggau yuran penyangkai kapal ti dipeda bisi kelikuh entara penyangkai kapal di Sarawak deka meri empas ba pengawa ubah trafik pengawa dagang enggau maritim ari sebarang penyangkai kapal ke bukai. – TVS
