GEORGE TOWN, 23 Jan: Malaysia bisi jalai diangkat nyadi sebuah menua maju ba rantau tu enti ulah ‘ngerumpak’ pengaya menua nengah chara makai suap diketu, ku Datuk Seri Anwar Ibrahim.
Menteri Besai (PM) madah tuai politik, staf opis perintah renggat atas tauka opis penerit adat mesti enggau enda tau enda badu ngereja ulah baka nya.
“Aku sigi enda belembut agi enggau ulah orang ti ngena kunterik tauka projek endur bulih tayka beambi ulih ngiga pengaya ke ukai hak sida,” ku iya maya bejaku ba Pengerami Rumah Tebuka Taun Baru China Kepala Menteri Chow Kon Yeow ditu sehari tu tadi.
Nangkan ke nya, Anwar madah rayat Malaysia mesti berani nulak penemu ekstremis bansa, makai suap enggau salah guna kuasa.
Iya andal menua deka ngerikod tikas pemansang enggau jampat ti enda kala dipeda ngelama tu nyema semangat beserakup tegap dikereja rayat lalu nulak semua ulah ke enda menuku nya.
Anwar madah, pengawa besemekih ketegal bansa enggau pengarap semina deka nanam pemenchi dalam korasia (komuniti raban mensia).
“Seruan korasia Madani ti minta pengandal kitai ke nyadi rayat. Semua pengarap bisi adat diri empu, tang deka idup dalam korasia mesti meretika mensia, lalu mensia nya nadai reti enti nadai pengasih penyiru ke pangan diri.
Lebuh bisi besemekih bansa enggau pengarap ke sempil, nyadi pekara ke ditarak nya endang pemenchi. Kitai patut nerima bida kitai enggau pangan diri nyadi siti pengering,” ku iya.
Ngelansa pasal ulah “komisyen” enggau “pemeri” ba pengawa bepilih besai, Anwar madah ulah baka nya nyata ngerugi menua enggau rayat mayuh.
“Pemeri ungkup pemaik nya okey, tang pemeri ungkup undi ba pengawa bepilih besai nya kebendar makai suap,” ku iya.
Nangkan ke nya, Anwar muji Perintah Nengeri Pulau Pinang laban nyaran ngagai pemansang ekonomi nengeri nya seriris enggau pemaik pekara rama sereta berundingka raban orang seranta ba mengeri sereta B40.
Sama datai Tuai Pemegai Menua (TYT) Pulau Pinang, Tun Ahmad Fuzi Abdul Razak enggau Kepala Menteri, Chow Kon Yeow. – TVS
