MIRI, 22 Jan: Manik ti digaga Orang Ulu entara kereban ke mesti diintu enggau ditan laban seni ngaga manik siti ari pengelandik ke semina bisi di Sarawak.
Pengelandik nya ukai semina ditan ungkup rebak dudi aja, tang sebagi ari chara dikena ngangkatka sektor dagang temuai, lebih agi di Miri.
Ku Kaunselor Majlis Bandaraya Miri (MBM) Jeffery Phang Siaw Foong madah, program randau enggau eksibisyen entara chara ke suah diambi dikena ngenanka pemanah gari asal etnik, seraya ngerembaika inovasyen enggau kreativiti ti ngaul pengaga produk krafjari.
“Udah tu ila kitai ngarapka gerempung tu ulih bekerejasama enggau Business Events Sarawak (BESarawak) tauka Biro Konvensyen Sarawak ngatur program, ti nyadi organisasyen ngatur program perintah Sarawak dalam nyaup gerempung ngatur program randau enggau eksibisyen,” ku iya madah.
Iya mansutka jaku nya rambau Program Makai Lemai Taun Baru enggau Program Fesyen manik ti diatur Gerempung Orang Indu Orang Ulu Miri di Miri.
Berebak enggau nya, iya nerangka budaya enggau manik komuniti Orang Ulu di Miri bisi daya mantu ngangkatka Miri nyadi mengeri dagang temuai enggau mengeri alai raun.
“Aku pechaya budaya manik ke bisi dikembuan kitai di Sarawak, kitai ulih mantu ngangkatka menua Miri tebilang ke endang udah enggau pengawa ngaga manik lebih agi ba dalam bidang dagang.
“Kitai ulih ngangkatka Sarawak nengah manik ti bemacham chura, marik sereta produk bukai ti digaga nguna manik. Kitai mesti mantaika manik ke digaga di Sarawak nyentu ke tikas entarabansa,” tandu iya.
Nangan ke nya, iya madahka, program fesyen manik ke diatur nya ulih nyadi siti pelasar dikena mantaika produk manik indu komuniti Orang Ulu Miri baka Bao Alai, Bao Kura, Bao Barit sereta ke bukai.
Program nya diatur kedua kali, lalu keterubah diatur kena bulan September 2022. -TVS
