SIBU, 22 Jan: Pengelantang nembiak di sitak Kunsil Nengeri (DUN) Nangka ari sukut pelajar terus dikenatika pengari rayat, lebih agi pengelandik sida dalam bejaku English.
Beduduk enggau nya, Palan Servis DUN Nangka begulai enggau Yayasan Farley udah ngelancharka Kimpin ‘Book Drive’ ti mai tuju deka ngumpul sepenyampau 11,000 iti bup anak mit dalam Jaku English.
Semua bup nya deka diberi ngagai nembiak ke begunaka kereban sanding ke ulih nambahka penau penemu tauka narak ulah sida rinduka macha bup dalam jaku nya.
Ku Sapit Menteri Pelajar, Inovasyen enggau Pemansang Pengelandik, Datuk Dr Annuar Rapaee madah, kereban bup ke deka digumpul nya deka terus disadung ngagai nembiak ke diau ba menua pesisir.
Program nya sebagi ari inisatif Palan Servis DUN Nangka ti deka nentuka genap embiak sekula ba menua pesisir landik nulis, macha enggau bejaku English.
“Aku ngarika Palan Servis DUN Nangka beterima kasih ngagai Eijing laban bejalaika inisiatif baka tu.
“Kitai sigi begunaka mensia mayuh ke ulih meri bup seraya kitai ulih nerenak ulah tauka budaya rindu macha ba pengidup nembiak kenyau ari umur biak.
“ Anak kitai mesti seruran macha bup awak ke sida ulih nguasa Jaku English. Berindik ari nya, kitai deka ngidar bup nya ke rumah panjai, genturung pendiau bukai sereta sekula ba menua pesisir,” ku iya rabau dirandau pengarang berita pengudah ngelancharka ‘Book Drive’ empai lama di Sibu.
Annuar ke mega Kaban Kunsil Nengeri (ADUN) Nangka nerangka, ‘Book Drive’ nya deka disediaka ba tetiap pampang Farley di serata Sarawak enggau ba sekeda palan ke suah dilawa mensia mayuh.
Iya madahka, naka ke diatu, bisi 1,000 bup udah mujur digumpul ke diberi Yayasan Farley, lalu tu ngujungka sepenyampau 10,000 iti agi bup deka digumpul udah tu.-TVS
