KUCHING, 21 Jan: Pemeri agih belanja khas penyampau RM300 juta ungkup Sarawak nitihka pekara 112D konstitusyen perintah besai endang pekara ke patut, pia ku Sapit Menteri ba Opis Menteri Besai (Pekara Sabah, Sarawak enggau Pengawa Khas), Datuk Wilson Ugak Kumbong.
Kebuah pia, ku iya laban pekara nya udah disemaya dalam Sempekat Malaysia 1963 (MA63).
“Tu ukai kitai minta tang endang udah disemaya dalam sempekat Malaysia MA63.
“Taja enda ulih mayar nitih kedeka pinta kitai menua Sarawak, tang agih nya deka dibayar tetiap taun,” ku iya lebuh dirandau pengarang berita TVS kemari.
Dulu ari tu, Menteri Besai, Datuk Seri Anwar Ibrahim maya penemuai seraya gawa dua hari iya ke Sarawak setuju deka nambahka agih belanja khas penyampau RM300 juta ungkup Sarawak nitihka pekara 112D konstitusyen perintah besai ari RM16 juta ke sebedau tu.
Taja pia, pemeri nya bepanggai ba formula agih ke deka langgur enggau pemisi tikas wang perintah besai.-TVS
