KUCHING, 16 Nov: Urung 2,053 raban Polis Diraja Malaysia ( PDRM ) Kontinjen Sarawak udah bekejang gawa ngagai 31 sitak Parlimen di serata nengeri tu pagi tadi.
Kepala Polis Sarawak, Datuk Mohd Azman Ahmad Sapri madah, ari penyampau nya urung 1,272 iku pemesai polis bepangkat baruh ari Indu Opis Kontinjen (IPK) Sarawak, Raban Gerakan Am Batalion 11, IP Briged, PULAPOL Kuching, Marin enggau Pelatih Plak diberi pengawa nyaga endur Pengawa Bepilih Besai ke-15 ( PRU-15 ) di selampur Sarawak.
“Sida bekejang ari ari IPK pagi tu tadi lalu sekeda ke bukai nurun ari rumah diri empu,” ku iya.
Iya madah munyi nya maya bejadika pengawa ‘Flag-Off” Bantuan Sumber Manusia beserimbai enggau PRU-15 di IPK Sarawak, ditu pagi tadi.
Ku iya pengawa meri tanggungpengawa udah dibagi ngagai genap Tuai Polis Pelilih (KPD) lalu sida diberi tanggungpengawa magi pengawa ngagai pegawai ke dibaruh sida.
“ Entara pengawa nya baka nyaga peti undi enggau ngira undi lalu ditangkan nyaga pengelikun ba endur ke gawa,” ku iya.
Azman mega nangkan bala pemesai ke bejalaika pengawa sida seruran nyaga pengelikun sereta nyaga pengerai diri beduduk ari gaya hari tu menuku jam ke diatu.- TVS
