KUCHING, 6 Okt: Persatuan Ngajat Asal Iban (NGASI) deka ngerembaika kelas ngajat ke diatur sida ngagai pelilih bukai, tebal agi ba renggat sekula.
Chairman NGASI, Bartholomew Sirow Chong madahka, tuju nya dikena matak pengerindu nembiak ba sekula ngambi bagi ba dalam kelas ngajat enggau kelas main asal bukai ti nyadi identiti komuniti Iban.
Naka ke diatu, iya madahka NGASI ngajar orang ngajat enda milih renggat umur lalu sida datai ari sekeda pelilih bukai, kelimpah ari Kuching.
“Sida ke ngambi bagi ba dalam kelas tu iya nya datai ari Samarahan, Simunjan, Serian, Kuching.
“Taja pan jauh tang nya enda nyadi penanggul ke nekul sida nurun belajar ngajat enggau NGASI,” ku iya madah rambau ditanya pengarang berita TVS apin lama ke udah.
Bartholomew nerangka, semua pesereta ke ngambi bagi ba dalam kelas ngajat nya ngambi timpuh dua bulan ke ngaul renggat ngajat ‘basic’ enggau ‘advance’.
Kelimpah ari kelas ngajat, NGASI mega deka muka kelas betabuh laban nya siti ari main asal ti dikerinduka nembiak rebak baru.
“Kelimpah ari kami mega bisi langgur deka muka kelas betabuh, begendang enggau ke bukai ba taun baru,” ku iya madah agi.
Entudi ke nya, siku jurulatih NGASI, Joefrazier Jeffrey Kemping madahka, gerempung nya ngarapka lebih mayuh agi ejensi perintah enggau Gerempung Ukai Dikuasa Perintah ulih mantu ngemujurka perambu enggau juluk sida ti deka ngaul nembiak di sekula, seraya ngansah pengelandik nembiak ba dalam seni enggau main asal Iban.
“Naka ke diatu, mensia mayuh meri sambut ke chukup manah. Mayuh orang ngiga bala kami laban deka ngambi bagi ba kelas ngajat enggau program ke bisi diatur NGASI.
“Ambika chunto bala ari Sri Aman, Sibu, Miri enggau ke bukai. Beduduk ari nya kami deka baum ngiga chara baka ni kami ulih ngelawa sida ari siti pelilih ke pelilih bukai,” ku iya madah.
Berebak ari nya, NGASI deka ngiga chara ti pemadu semitan dikena nentuka sida mega ulih ngajar nembiak tauka orang besai tuai ke deka belajar ngajat sereta main asal ke bukai.
Sebedau tu, bisi 80 iku pesereta ke udah mujur nembuka kelas ngajat sereta nerima setipikit ari NGASI.
Gerempung tauka serakup ti bekaul enggau pengawa ngenanka seni, adat enggau main asal Iban endang disukung perintah Sarawak laban nya entara penyelai enggau pemanah ke ngasuh nengeri tu tebilang ba tikas dunya. – TVS
