KUCHING, 22 Sept: Datuk Patinggi Tan Sri Dr Alfred Jabu Numpang siku tuai tauka mentor ti pemadu dipebasa sereta ulih nyadi teladan.
Pia ku Premier Sarawak, Datuk Patinggi Tan Sri Abang Johari Tun Openg madah.
“Aku meri tabi puji ngagai Tan Sri Alfred Jabu lalu iya ukai semina kaban ke sama enggau gawa, tang mega mentor kami lebuh iya nyadi ketuai Perintah Sarawak begulai enggau Tuai Pemegai Menua (TYT) Tun Pehin Sri Abdul Taib Mahmud. Nengah sida, kami ti generasi kedua tu udah dilatih sereta diiring bala tuai pemadu tinggi. Diatu aku enggau Douglas Uggah tu mih asil ari tuai ke ngembuan pengeransing tu,” ku iya madah.
Premier Sarawak Datuk Patinggi Tan Sri Abang Johari Tun Openg madahka diatu mayuh pekara udah berubah tang sesiku tuai patut nitihka gaya ubah tauka runyut arus pemansang.
Pekara tu ngambika nengeri Sarawak ulih nyapai status nengeri mansang sereta ngembuan penatai pemisi ke tinggi rambau taun 2030.
“Nya alai Perintah Sarawak chakah deka ngemansangka sukut pelajar, adat enggau main asal sereta ngemanahka tikas ekonomi ngambika nengeri tu ulih nyapai status nengeri mansang manggai taun 2030, ku iya madah lebuh bejaku ba pengerami bejadika filem dokumentari “A Gawai Antu Documentary Film”, lebuh hari dua.
Nangkan ke nya iya mega madahka kitai patut nyadi chunto ngagai nengeri bukai laban kitai ngembuan pupu raban bansa sereta idup dalam komuniti ti likun.
Pengerami bejadika filem dokumentari tu diatur ba Muzium Budaya Borneo di Kuching, bedau lama ke udah.
Ke lansa, Gawai Antu tu atur pengawa ti pemadu besai ba raban bansa Iban.
Kebuah pia laban Gawai Antu tu sebengkah pengawa dikena merantu orang ke udah midang ninggalka dunya injau kitai tu.
Filem dokumentari tu dirikod maya pengerami Gawai Antu ba rumah panjai iya di Gensurai, Layar ,Betong dalam bulan Disember 2018.
Tu mih dokumentasyen ti deka nyadika malin ungkup raban nembiak dudi hari.- TVS
