BETONG, 27 Julai: Bisi 29 iku pengempu tanah alai Projek Nangkir Genturung Pendiau (SPK) ba sepemanjai Jalai Suri di Debak udah nerima chek pampas tanah sida ti beungkus RM2.36 juta ensanus.
Sapit Menteri Pemansang Orang Indu, Anak Mit enggau Pengelantang Komuniti, Mohd Razi Sitam, madahka, projek nya ti dikemendarka perintah Sarawak dikena ngurangka penedat penyampau peranak ba siti-siti genturung pendiau seraya meri pemaik ngagai rebak baru ti begunaka taba alai ngentak rumah baru.
“Projek tu udah dikemendarka ba taun 2021 baruh Projek Rayat ke alai kitai ngaga perambu ngagai Premier Sarawak maya nya bekaul enggau pemesai guna Skim Nangkir Genturung Pendiau tu ngagai peranak di kandang menua Debak ti majak dedat lalu ditambah mega rebak baru begunaka taba alai sida ngentak rumah baru,” ku iya madah rambau ditanya pengarang berita apin lama ke udah.
Berebak enggau nya, iya ke mega Kaban Kunsil Nengeri (ADUN) Saribas madahka perintah udah ngemendarka 27.93 hektar pemesai endur diguna projek SPK di Debak.
Iya nerangka, pampas ke diberi ngagai pengempu tanah mandangka tanah ke diambi dikena bejalaika projek perintah enda diambi pia aja, tang diberi pampas nitihka penyampau ke patut pengudah dipansik Opis Tanah enggau Survei (JTS).
Ba pengerembai bukai, Mohd Razi madahka projek Jalai Suri-Tuie ti beungkus RM42 juta ti dikemendarka perintah suba udah tembu 76 peratus naka ke diatu.
“Ba minggu siti nyin kemari aku bisi begulai enggau Sapit Premier Sarawak Datuk Amar Douglas Uggah Embas ngabas taba projek nya ti mega disempulang sama bis nyempulang raban konsultan enggau kunteriktor. Bepelasarka ripot ari konsultan jalai nya udah tembu kira-kira 76 peratus,” ku iya madah agi.
Projek nya endang projek sakit laban patut berengkah digaga ba ujung taun 2019, tang ketegal pandemik COVID-19 nyau tejanggal semak dua taun.
Kelimpah ari nya, iya nerangka senentang bisi dua jematan ti dikearapka ulih digaga enggau jampat. – TVS
