BETONG, 10 Jun: Perintah Sarawak deka terus nyungkak pemansang sektor dagang temuai di serata nengeri tu awakka ulih nambahka asil penatai pemisi ngagai rayat enggau nengeri.
Tu nyengkaum nyerungkai sereta ngiga endur ke ulih dikemansangka nyadi entara palan dagang temuai ti ulih dilawa temuai sekalika ari serata nengeri tu tauka di luar Sarawak.
Sapit Premier Sarawak Datuk Amar Douglas Uggah Embas madahka, bagi menua Betong mayuh endur ke ulih dikemansangka nyadi entara palan pematak temuai di pelilih nya.
“Diatu kitai deka ngelala, ngemansangka sereta bedajaka semua kandang endur tu awakka ulih nyadi palan ke semampai dilawa mensia mayuh.
“Ambika chunto Bukit Sadok, iya nya taba kubu bujang berani Iban ti mega nasionalis Sarawak Rentap ulih dikemansangka.
“Rentap enda nemu senentang chara perang ke betul, tang iya udah milih Bukit Sadok ke chukup strategik alai ngaga kubu,” ku iya madah rambau bejadika aum Metro Polytechnic Industrial Advisory Committee (IAC) Betong lebuh Hari Empat.
Berebak ari nya, Uggah ke mega Kaban Kunsil Nengeri Bukit Saban nerangka, perintah nengeri ba bulan siti nyin kemari udah ngemendarka duit turu penyampau RM15.9 juta dikena ngaga model kubu Rentap ti disikap enggau perengkaguna ke lebih manah di Bukit Sadok.
“Tu siti ari chara ke pemadu manah dikena kitai ngenang taba tauka palan ti ngembuan sejarah sereta cherita lama seraya meri basa ngagai niang bujang berani Rentap,” ku Uggah madah.
Kelimpah ari nya, pemansang sektor dagang temuai di Betong deka meri peluang ngagai rayat ke mendam di pelilih nya nambahka tikas ekonomi sekalika ari sukut bedajaka produk dagang temuai sereta ngaul diri ba pengawa mandangka seni enggau main asal.
