Betong, 22 Mei: Bagi menua Betong deka terus dikemansangka tebal agi ari sukut pemansang pelajar enggau ekonomi manggai taun 2030.
Ku Sapit Premier Sarawak, Datuk Amar Douglas Uggah Embas madah pekara tu deka terus diberi perati nengah mayuh macham langgur sereta begunaka sukung enggau kaul ke manah ari semua peranak ke diau di Betong.
“Kitai bisi mayuh aktif program ti nyengkaum sosio-ekonomi program ke dipejalaika di Bagi Menua Betong. Kitai udah bejalaika tanggung pengawa kitai.
“Baka ke dipadahka Residen, iya deka berunding sereta merambu senentang pemansang ba ditu. Mayuh udah digaga kitai. Ari sukut pemansang infrastrakcha, asaiku Betong nyadi entara pelilih ke pemadu mayuh nerima pemansang di Sarawak. Tu nyengkaum bekal karan, ai enggau jalai alun.
“Pemar ke ditapi kitai iya nya ari sukut pelajar enggau ekonomi. Nya alai, makmal tu ila deka diatur dikena berundingka chara tauka perambu ke patut dipejalaika manggai taun 2030 seraya nentuka Betong enda tinggal ari pemansang,” ku iya madah.
Iya bejaku munyi nya rambau bejadika Makai Malam Ngintu Gawai Dayak Renggat Bagi Menua Betong 2022 ke udah diatur sereta ngangkatka rambai jaku “Beserakup Segulai Sejalai”.
Pia mega, iya ke mega Kaban Kunsil Nengeri Bukit Saban ngelalau mensia mayuh tebal agi komuniti Dayak awakka terus beserakup nuju pemansang menua seraya nyungkak ekonomi di nengeri tu.
“Nya alai malam tu aku sama mai kitai terus nanchang rat agi kaul kitai, rat agi runding kitai awakka kitai di Bagi Menua Betong tu ulih sama menih penemu, runding, tulang, enggau peluh awakka kitai ulih ngemansangka menua sereta enda tinggal ari pemansang,” ku iya madah agi.
Ba pengerami nya Uggah udah meri duit turu penyampau RM50,000 ungkup pengerami nya dikena nyukung mayuh agi aktiviti ke diatur di pelilih nya udah tu ila.
Kelimpah ari nya, Uggah mega minta semua komuniti Dayak awakka terus ngemansangka diri ari sukut pelajar enggau nampung pelajar ba tikas ke pemadu tinggi seraya ngambi chunto peranak menua Betong ke bukai ti udah mujur baka Dr Nelson Ilan ti udah mujur ba tikas PHD sereta bulih gela dutur ba pengawa ngemansangka diri.
Tu ketegal, pemansang di menua tu ulih dijapai nengah penemu, pengelandik enggau aset ke bisi di Betong.
