MIRI, 7 Mei: Perintah Sarawak nengah Opis Menteri Dagang Temuai, Industri Kreatif enggau Seni Pemerindang sereta Sarawak Tourism Board (STB) terus bebendar deka nyungkak enggau mulaika pemanah sektor dagang temuai di nengeri tu.
Nitihka penerang ke diambi ari UKAS, Penyampau temuai ke datai ke nengeri tu dijangka terus nambah, lebih agi beserimbai musim pengerami.
Sapit Menteri Dagang Temuai, Industri Kreatif enggau Seni Pemerindang (Dagang Temuai), Datuk Sebastian Ting madahka, sebedau tu perintah nengeri nyaran penatai temuai ke Sarawak penyampau 1.2 juta iku sepemanjai taun tu.
“Sebedau tu perintah Sarawak nyaran 1.2 juta iku temuai datai nemuai sepemanjai taun tu,”
Beduduk ari nya, Sebastian madahka, iya pechaya penyampau temuai datai ke Sarawak ulih manggai 1.5 juta iku temuai, taja pan opis menteri semina nyaran 1.2 iku temuai.
Kenyau ari bulan 4 ke udah, Sarawak udah nerima mayuh penerebai bilun ari Kuala Lumpur, Singapura enggau Pulau Pinang sereta ari Singapura ke Miri enggau Kuching.
“Sarawak mega udah nerima mayuh penerebai bilun baka ari Kuala Lumpur, Singapura, Pulau Pinang ke Miri enggau Kuching,”
Berebak ari nya, iya pechaya gaya menua diatu ke udah ngalih ke renggat endemik ba pun bulan tu tadi deka mantu matak mayuh temuai datai ke Sarawak.
Tebal agi, mayuh penendu udah diberi perintah seraya rayat diatu udah mupuk ngasaika gaya pengidup normal pengudah bemacham aktiviti udah berengkah dipejalaika baru.
Ku iya madah agi, statistik penatai temuai ke Miri mega mandangka penambah ke positif.
